Саха народнай поэта М.Е.Тимофеев төрөөбүтэ 85 сылыгар аналлаах дьаһаллар буолан аастылар

Бороҕон нэһилиэгэр кулун тутар 15 күнүгэр киэн туттар биир дойдулаахпыт Саха народнай поэта М.Е.Тимофеев төрөөбүтэ 85 сылыгар аналлаах дьаһаллар буолан аастылар.

Кулууп дьиэҕэ ити күн дьон тоҕуоруһа муһунна. М.Тимофеев олоҕор, айар үлэтигэр аналлаах дьиэ кэргэнэ бэлэхтээбит кинигэлэринэн, хаартыскаларынан, тутта сылдьыбыт малларынан быыстапканы олохтоох библиотека туруорбутун дьон  сэргээн көрдүлэр.

Республика, нэһилиэк  гимнэрин тылларын  автора буоларынан, ити ырыалары күргүөм толоруунан тэрээһин саҕаланар. Кырдьаҕастар ахтыы оҥордулар, М.Е.Тимофеев чугас аймаҕа, бастакы снайпер Д.А.Гуляев  туһунан суруйбут сэһэнинэн инсценировка көрдөрдүлэр.

2саастаах Арсений Миндаевтан саҕалаан уон биирис кылаас уолаттарыгар тиийэ  биэс уон биэс оҕо М.Тимофеев айымньыларынан уус-уран ааҕыы күрэҕэр кытыннылар.Ортоку сүһүөххэ сэттис кылаас үөрэнээччитэ Тимофей Александров кырдьаҕас таайдарыгар  биллиилээх мас, тимир ууһа Кирилл Кириллович Мальцевка анаммыт "Тимир ууһа" хоһоону ааҕан көрөөччүлэри долгутта,  бастакы миэстэни ылла. Гран-прины сэттис кылаас үөрэнээччитэ Айынаат Константинов ылла.

 Улахан дьоҥҥо "Сулустан ыйыппытым"диэн Михаил Тимофеев хоһоонноругар айыллыбыт ырыалары толорууга күрэх буолан ааста. Кыайыылааҕынан оҕо тэрилтэтин иитээччитэ Зебо Абдуллаева биир санаанан ааттанна.

Оскуола библиотекатын тэрийиитинэн Михаил Тимофеев олоҕор, айар үлэтигэр аналлаах дьиэ кэргэн литературнай викторината буолла. Кыайыылаахтарынан Александровтар, Колтовскойдар, Каратаевтар, Павловтар дьиэ кэргэттэрэ буоллулар.

Кыттааччылар бары туоһу суруктарынан, кыайыылаахтар грамоталарынан , кубоктарынан бэлиэтэннилэр.