Бүлүү улууһун эдэр кэрэспэндьиэннэрин сүлүөтэ.

50 -тан тахса сыл “Бэлэм буол” (билиҥҥитэ “Кэскил”) оҕо хаһыатыгар кылаабынай редакторынан үлэлээбит, Россия рекордун кинигэтигэр киирбит, СӨ суруналыыстыкаҕа Государственнай бириэмийэтин лауреата Нина Иннокентьевна Протопопова төрөөбүт үөскээбит дойдутугар Чернышевскай нэһилиэгэр,  С.М. Васильев аатынан орто оскуолатыгар, Бүлүү улууһун эдэр кэрэспэндьиэннэрин сүлүөтэ буолан ааста. “Кэскил”,  “Юность Севера” хаһыат үлэһиттэрэ, кылаабынай редактор Е.С. Иринцеева - Огдо салайааччылаах 9 буолан кэлэн киэҥ далааһыннаах, үрдүк таһымнаах тэрээһини ыыттылар.

Бу сүлүөккэ Дьөккөн, Баппаҕаайы, Бүлүү куоратыттан, Чернышевскай орто оскуолаларын   пресс-киинин эдэр кэрэспэндьиэннэрэ, салайааччылара уонна учууталлар кытыннылар. Редакция үлэһиттэрэ олус наадалаах, интириэһинэй маастар кылаастары ыыттылар. Холобура хаһыакка суруйууга тиэмэни таба тайаныы, хаартыскаҕа түһэрии кистэлэҥнэрэ, суруналыыстыка жанрдарыгар, ааҕыы кыһалҕатын кэпсээтилэр. Пресс-кииннэр икки ардыларыгар квест оонньуу ыытылынна. Кыайыылаахтарынан   Дьөккөн, Баппаҕаайы, Чинэкэ хамаандалара таҕыстылар.

Балаһыанньа быһыытынан,  дьиэҕэ сорудах “Бүлүү экологията”,” Мин оскуолам (олорор нэһилиэгим) киэн туттар киһитэ” диэн өйтөн суруйууга күрэх биллэриллибитэ. Уопсайа 15 үлэ киирбит. Биһиги Бүлүү 1 № - дээх “Ориентир” пресс-киинин эдэр суруналыыһа Романова Даша “Бүлүү экологията” үлэтэ үһүс бочуоттаах миэстэни ылла. Дедюкина Ангелина  ” Мин улууһум киэн туттар киһитэ” диэн Россия журналист Н.Крылов туһунан суруйан, биһирэбил бириискэ тигистэ. Кыттыбыт хамаандаларга тэрийээччилэр минньигэс бириис туттардылар. Күрэххэ миэстэлэспит оҕолор грамота, сыаналаах бэлэх, Георгий Белоусов «Алгыстаах ааттар» сурунаалын ылан, олус үөрдүлэр.

«Мин дьиэ кэргэним сөбүлүүр дьарыга” кэллиэксийэһиттэр быыстапкаларыгар нэһилиэк олохтоохторо уонна куораттан тахсан кыттыыны ыллылар. Россия суруналыыстарын чилиэнэ Васильев Александр Васильевич – Көрдүгэн  «Бүлүү сирин туһунан значоктар историялара” лиэксийэ быыастапката дьон интириэһин тарта.

Түмүккэ сүлүөт кыттыылаахтарыгар, олохтоохторго редакция үлэһиттэрэ лотерея оонньоттулар. Кыттыбыттар үксүлэрэ сүүйэн, дьиэлэригэр илии тутуурдаах бардылар.

Нина Иннокентьевна Протопопова аатын үйэтитиигэ аналлаах төгүрүк остуолга кэпсэтии буолла. Манна Бүлүүтээҕи үөрэх управлениетын начальнига Н. М. Семенова редакция коллективыгар махтал сурук туттарда, Чернышевскай оскуолатын директора Э.И. Корякина Нина Иннокентьевнаҕа анаан сквер туттарар туһунан этии киллэрдэ. Эдэр кэрэспэндьиэннэртэн Нина Иннокентьевнаны солбуйар биллэр суруналыыс тахсарыгар бары күүскэ үлэлэһэргэ этии киирдэ.